Superndeshja ndërmjet dy skuadrave, FK Kukësi – FK Partizani, ka hapur sezonin e ri të Kategorisë Superiore.
Pas ceremonisë të organizuar nga Federata Shqiptare e Futbollit në stadiumin “Elbasan Arena”, ka startuar edicioni i ri me ndeshjen mes verilindorëve dhe kryeqytetasve.
Golin e vetëm të kësaj përballjeje e shënoi Vasil Shkurtaj në minutën e 39 të pjesës së parë, pas një 11-metërshi të fituar nga 21-vjeçari Valon Ethemi.
Penalltinë e shndërroi në gol qendërsulmuesi, duke u bërë kështu autori i golit të parë në këtë edicion.
Të kuqtë nuk arritën të shënonin, pasi një top i goditur bukur nga futbollisti Mala preku shtyllën e jashtme të portës kuksiane, të mbrojtër nga portieri Ilir Avdyli.
Pas vërshëllimës së bilbilit të arbitrit kryesor Enea Jorgji, kuksianët arritën të “hakmerreshin” për disfatën e pësuar në ndeshjen finale të Superkupës së Shqipërisë dhe duke startuar më së miri aventurën në Kategorinë Superiore.
